പിണറായി വിജയൻ, എംഎൽഎ പി.എ. മുഹമ്മദ് റിയാസ്, ടി. വീണ എന്നിവർക്കെതിരെ കേസെടുക്കാൻ ഡിജിപിയോട് ഇ ഡി യുടെ നിർദ്ദേശം

തിരുവനന്തപുരം: സിഎംആർഎൽ–എക്സാലോജിക് ഇടപാടുമായി ബന്ധപ്പെട്ട അന്വേഷണത്തിൽ നിർണായക നീക്കവുമായി എൻഫോഴ്‌സ്‌മെന്റ് ഡയറക്ടറേറ്റ് (ED). മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയൻ, മുൻ മന്ത്രിയും എംഎൽഎയുമായ പി. എ. മുഹമ്മദ് റിയാസ്, ടി. വീണ എന്നിവർക്കെതിരെ അഴിമതി നിരോധന നിയമപ്രകാരം കേസ് രജിസ്റ്റർ ചെയ്യണമെന്ന് ആവശ്യപ്പെട്ട് സംസ്ഥാന പോലീസ് മേധാവിക്ക് (DGP) ഇഡി റിപ്പോർട്ടും കത്തും കൈമാറി.

അഴിമതി നിരോധന നിയമത്തിലെ സെക്ഷൻ 66(2) പ്രകാരം എഫ്‌ഐആർ രജിസ്റ്റർ ചെയ്യണമെന്നാണ് ഇഡിയുടെ ശുപാർശ. അന്വേഷണത്തിനിടെ ശേഖരിച്ച നിർണായക രേഖകളും തെളിവുകളും ഡിജിപിക്ക് കൈമാറിയിട്ടുണ്ടെന്നാണ് വിവരം. ഈ തെളിവുകളുടെ അടിസ്ഥാനത്തിൽ തുടർനടപടി സ്വീകരിക്കണമെന്നാണ് കത്തിലെ പ്രധാന നിർദേശം.

ഇഡി റിപ്പോർട്ടിൽ, പിണറായി വിജയൻ 3.28 കോടി രൂപ കൈക്കൂലി സ്വീകരിച്ചെന്നാണ് ആരോപിക്കുന്നത്. ടി. വീണ മുഖേനയാണ് സാമ്പത്തിക ഇടപാടുകൾ നടന്നതെന്നും, മുഹമ്മദ് റിയാസ് ഈ തുക ദുബായിലേക്ക് കടത്തിയെന്നുമാണ് റിപ്പോർട്ടിലെ മറ്റൊരു ആരോപണം.

നേരത്തെ ഇതേ കേസുമായി ബന്ധപ്പെട്ട് ഇഡി വിവിധ കേന്ദ്രങ്ങളിൽ പരിശോധനകൾ നടത്തുകയും, ടി. വീണയെ ചോദ്യം ചെയ്യുകയും ചെയ്തിരുന്നു. സിഎംആർഎൽ–എക്സാലോജിക് സാമ്പത്തിക ഇടപാടുകളുമായി ബന്ധപ്പെട്ട് ശേഖരിച്ച തെളിവുകളുടെ അടിസ്ഥാനത്തിലാണ് പുതിയ നടപടി സ്വീകരിച്ചതെന്നാണ് സൂചന.

അതേസമയം, ഇഡിയുടെ റിപ്പോർട്ടിലെ ആരോപണങ്ങൾ ബന്ധപ്പെട്ടവർ മുൻപ് നിഷേധിച്ചിട്ടുള്ളതാണ്. കേസിൽ ഇതുവരെ കോടതി കുറ്റം കണ്ടെത്തിയിട്ടില്ല. ഇഡിയുടെ റിപ്പോർട്ടിന്റെ അടിസ്ഥാനത്തിൽ കേരള പോലീസ് എന്ത് നടപടി സ്വീകരിക്കുമെന്നതാണ് ഇനി നിർണായകം.