കനത്ത മഴയ്ക്ക് സാധ്യത; കോഴിക്കോട് ജില്ലയിൽ രാത്രിയാത്രയ്ക്ക് നിയന്ത്രണം, അത്യാവശ്യമല്ലാത്ത എല്ലാ യാത്രകളും ഒഴിവാക്കണമെന്ന് ജില്ലാകളക്ടറുടെ നിർദേശം

Heavy Rain Travel Restrictions Collector News

കോഴിക്കോട്: കനത്ത മഴയ്ക്കും ശക്തമായ കാറ്റിനും സാധ്യതയുള്ള സാഹചര്യത്തിൽ കോഴിക്കോട് ജില്ലയിൽ രാത്രിയാത്രയ്ക്ക് നിയന്ത്രണം ഏർപ്പെടുത്തി. ഇന്ന് രാത്രി 7 മണി മുതൽ നാളെ രാവിലെ 7 മണി വരെയാണ് നിയന്ത്രണം.

മലയോര മേഖലകളിലേക്കും ഉയർന്ന പ്രദേശങ്ങളിലേക്കുമുള്ള അത്യാവശ്യമല്ലാത്ത യാത്രകൾ ഒഴിവാക്കണമെന്ന് ജില്ലാ കളക്ടർ നിർദേശിച്ചു.

ബംഗാൾ ഉൾക്കടലിൽ രൂപപ്പെട്ട തീവ്ര ന്യൂനമർദത്തിന്റെ സ്വാധീനഫലമായി ഇന്ന് വൈകീട്ട് മുതൽ നാളെ വരെ ജില്ലയിൽ ശക്തമായ കാറ്റിനും കനത്ത മഴയ്ക്കും സാധ്യതയുണ്ടെന്നാണ് മുന്നറിയിപ്പ്.

മലയോര മേഖലകളിൽ ഉരുൾപൊട്ടൽ, മണ്ണിടിച്ചിൽ, മരം വീഴൽ, പെട്ടെന്നുള്ള വെള്ളപ്പൊക്കം എന്നിവയ്ക്ക് സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് ജില്ലാ ദുരന്തനിവാരണ അതോറിറ്റി അറിയിച്ചു.

താമരശ്ശേരി, തിരുവമ്പാടി, കൂരാച്ചുണ്ട് തുടങ്ങിയ മലയോര മേഖലകളിലെ മണ്ണിടിച്ചിൽ സാധ്യതയുള്ള റോഡുകളിൽ പൊലീസ് ഗതാഗതം പൂർണമായും നിയന്ത്രിക്കും.

ദുരന്തനിവാരണവുമായി ബന്ധപ്പെട്ട അടിയന്തര വാഹനങ്ങൾക്ക് നിയന്ത്രണത്തിൽ ഇളവ് അനുവദിക്കും.

നദികൾ, ക്വാറികൾ, വിനോദസഞ്ചാര കേന്ദ്രങ്ങൾ, കടൽത്തീരങ്ങൾ എന്നിവിടങ്ങളിൽ വിനോദത്തിനും മീൻപിടിത്തത്തിനുമായി ഇറങ്ങുന്നതും കർശനമായി നിരോധിച്ചിട്ടുണ്ട്.

ജില്ലയിലെ താലൂക്ക് എമർജൻസി ഓപ്പറേഷൻ സെന്ററുകൾ (TEOC) 24 മണിക്കൂറും പ്രവർത്തിക്കും.

എല്ലാ വില്ലേജുകളിലും മഴയുടെ അളവും ജലനിരപ്പും ഓരോ മണിക്കൂർ ഇടവിട്ട് ശേഖരിച്ച് ജില്ലാ എമർജൻസി ഓപ്പറേഷൻ സെന്ററിലേക്ക് (DEOC) കൈമാറും.

അപകടസാധ്യതയുള്ള പ്രദേശങ്ങളിലെ ജനങ്ങളെ ആവശ്യമായ സാഹചര്യത്തിൽ സുരക്ഷിത കേന്ദ്രങ്ങളിലേക്കോ ദുരിതാശ്വാസ ക്യാമ്പുകളിലേക്കോ ഇന്ന് തന്നെ മാറ്റിപ്പാർപ്പിക്കുന്നതിനുള്ള നടപടികൾ തദ്ദേശസ്വയംഭരണ സ്ഥാപനങ്ങളും വില്ലേജ് ഓഫീസർമാരും സ്വീകരിക്കും.

ദുരിതാശ്വാസ ക്യാമ്പുകളുടെ വിവരങ്ങളും ഹെൽപ്‌ലൈൻ നമ്പറുകളും പ്രാദേശികമായി ജനങ്ങളെ അറിയിക്കും.

ദുരന്തനിവാരണ നിയമപ്രകാരം പുറപ്പെടുവിച്ച നിർദേശങ്ങൾ ലംഘിക്കുന്നവർക്കെതിരെ നിയമനടപടി സ്വീകരിക്കുമെന്നും ജില്ലാ ദുരന്തനിവാരണ അതോറിറ്റി അറിയിച്ചു.

English Summary:

Kozhikode district imposes night travel restriction due to heavy rain and strong wind warning. Restriction from tonight 7 pm to tomorrow 7 am. Collector directs to avoid non-essential travel to hilly and high-range areas. Due to deep depression over Bay of Bengal, strong wind and heavy rain expected. Police to control traffic on landslide-prone roads in Thamarassery, Thiruvambady, Koorachundu. Ban on entering rivers, quarries, tourist centers, beaches.

Heavy Rain Travel Restrictions Collector News