ഹോർമുസ് കടലിടുക്കിൽ ചരക്കുകപ്പലിന് നേരെ ആക്രമണം; തീപിടിച്ച കപ്പലിലെ ഒരു ഇന്ത്യൻ ജീവനക്കാരനെ കാണാതായി, 10 പേർ രക്ഷപ്പെട്ടു

​ദുബായ്: അന്താരാഷ്ട്ര കപ്പൽ ചാനലായ ഹോർമുസ് കടലിടുക്കിൽ വെച്ച് ചരക്കുകപ്പലിന് നേരെയുണ്ടായ വൻ ആക്രമണത്തിൽ ഒരു ഇന്ത്യൻ ജീവനക്കാരനെ കാണാതായി. സൈപ്രസ് പതാക ഘടിപ്പിച്ച 'ജി.എഫ്.എസ് ഗ്യാലക്സി' (GFS Galaxy) എന്ന ചരക്കുകപ്പലിന് നേരെയാണ് ആക്രമണമുണ്ടായത്. ആക്രമണത്തിൽ കപ്പലിന് തീപിടിച്ചതായാണ് വിവരം.​അപകടസമയത്ത് 11 ഇന്ത്യൻ ജീവനക്കാരാണ് കപ്പലിൽ ഉണ്ടായിരുന്നത്. ഇതിൽ 10 പേരെ സുരക്ഷിതമായി രക്ഷപ്പെടുത്താൻ സാധിച്ചതായും കാണാതായ ഒരാൾക്കായി തിരച്ചിൽ ഊർജ്ജിതമാക്കിയതായും അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.​ഇറാന്റെ വിലക്ക് മറികടക്കാൻ ശ്രമിച്ചതായി സൂചന​ഇറാന്റെ കർശനമായ വിലക്ക് മറികടന്ന് അനധികൃതമായി ഹോർമുസ് കടലിടുക്ക് മുറിച്ചുകടക്കാൻ ശ്രമിക്കുന്നതിനിടെയാണ് ജി.എഫ്.എസ് ഗ്യാലക്സിക്ക് നേരെ ആക്രമണമുണ്ടായതെന്നാണ് പ്രാഥമിക വിവരങ്ങൾ വ്യക്തമാക്കുന്നത്. പശ്ചിമേഷ്യയിൽ നിലനിൽക്കുന്ന കടുത്ത നയതന്ത്ര-സൈനിക അസ്വാരസ്യങ്ങൾക്കിടയിലാണ് തന്ത്രപ്രധാനമായ ഈ സമുദ്രപാതയിൽ വീണ്ടുമൊരു ചരക്കുകപ്പൽ ആക്രമിക്കപ്പെട്ടിരിക്കുന്നത്. കപ്പലിലെ ജീവനക്കാരുടെ കൂടുതൽ വിവരങ്ങൾ പുറത്തുവിട്ടിട്ടില്ല.