ഹോർമുസ് അടച്ചു ഇറാൻ; യുഎസ് ആക്രമണം ശക്തം — പശ്ചിമേഷ്യ വീണ്ടും യുദ്ധഭീഷണിയിൽ

ടെഹ്റാൻ: പശ്ചിമേഷ്യയിൽ സംഘർഷാവസ്ഥ കൂടുതൽ രൂക്ഷമാകുന്നു. അമേരിക്ക ആക്രമണം ശക്തമാക്കിയതിനെ തുടർന്ന് നിർണായകമായ ഹോർമുസ് കടലിടുക്ക് ഇറാൻ അടച്ചതായി പ്രഖ്യാപിച്ചു. യുഎസ് ഇടപെടൽ പൂർണമായി അവസാനിപ്പിക്കുന്നതുവരെ കടലിടുക്ക് തുറക്കില്ലെന്ന കടുത്ത നിലപാടാണ് ഇറാൻ സ്വീകരിച്ചിരിക്കുന്നത്.

ഹോർമുസ് അടച്ചതിന് പിന്നാലെ ഇറാനിൽ അമേരിക്കയുടെ ബോംബാക്രമണങ്ങളും ശക്തമായി തുടരുന്നു. നിലവിൽ നടക്കുന്നത് യുഎസിന്റെ മൂന്നാംഘട്ട സൈനികാക്രമണമാണെന്നാണ് റിപ്പോർട്ടുകൾ. യുദ്ധം ആരംഭിച്ചതിന് ശേഷമുള്ള ഏറ്റവും ശക്തമായ ആക്രമണങ്ങളിലൊന്നാണിത് എന്ന് അന്താരാഷ്ട്ര മാധ്യമങ്ങൾ സൂചിപ്പിക്കുന്നു.

ഇറാന്റെ തെക്കൻ തീരദേശ നഗരങ്ങളായ അസലുയെ, ഡെയ്ർ, ബുഷെഹർ, ബന്ദർ അബ്ബാസ്, സിറിക് തുടങ്ങിയ പ്രദേശങ്ങളിൽ ശക്തമായ സ്ഫോടനങ്ങൾ ഉണ്ടായതായി ഇറാൻ സ്റ്റേറ്റ് ബ്രോഡ്കാസ്റ്റർ റിപ്പോർട്ട് ചെയ്തു. എന്നാൽ യുഎസ് സൈന്യം ആക്രമണത്തിന്റെ കൃത്യസ്ഥലങ്ങൾ വെളിപ്പെടുത്തിയിട്ടില്ല.

ഇതിനിടെ, അനുമതിയില്ലാതെ ഹോർമുസ് കടലിടുക്ക് വഴി സഞ്ചരിക്കാൻ ശ്രമിച്ച കപ്പലിനെ ഇറാന്റെ ഇസ്‌ലാമിക് റെവല്യൂഷണറി ഗാർഡ് കോർപ്സ് (IRGC) ആക്രമിച്ചതായി സ്ഥിരീകരിച്ചു. മുന്നറിയിപ്പുകൾ അവഗണിച്ച കപ്പലിനെ തടഞ്ഞതായും സമുദ്രസുരക്ഷയ്ക്ക് ഭീഷണിയുണ്ടാക്കിയ സാഹചര്യത്തിലാണ് നടപടി എടുത്തതെന്നും IRGC വ്യക്തമാക്കി. കപ്പലിന്റെ വിവരങ്ങൾ പുറത്തുവിട്ടിട്ടില്ല.

യുഎസ് ആക്രമണങ്ങൾക്ക് ശക്തമായ തിരിച്ചടി നൽകുമെന്ന് ഇറാൻ മുന്നറിയിപ്പ് നൽകിയിട്ടുണ്ട്. അതേസമയം, സംഘർഷം കുറയ്ക്കാനുള്ള ശ്രമമായി ഇറാൻ വിദേശകാര്യമന്ത്രി അബ്ബാസ് അരാഗ്‌ചി ഒമാനിലെത്തി ചർച്ചകൾ നടത്തിയിരുന്നു. ഹോർമുസ് വഴി സുരക്ഷിതമായ കപ്പൽഗതാഗതം ഉറപ്പാക്കുക എന്നതായിരുന്നു ചർച്ചകളുടെ പ്രധാന അജൻഡ.

മുന്‍പ് യുഎസും ഇറാനും തമ്മിൽ ചർച്ചകൾ തുടരാൻ ധാരണയായിരുന്നുവെന്ന് യുഎസ് പ്രസിഡന്റ് ഡൊണാൾഡ് ട്രംപ് വ്യക്തമാക്കിയിരുന്നു. എന്നാൽ ഹോർമുസിലെ ബദൽപാതയിലൂടെ പോയ കപ്പലുകൾക്ക് നേരെയുണ്ടായ ആക്രമണത്തെ തുടർന്ന് ജൂൺ 17 മുതൽ പ്രാബല്യത്തിലുണ്ടായിരുന്ന വെടിനിർത്തൽ കരാർ അവസാനിച്ചതായും അദ്ദേഹം അറിയിച്ചു.

ഇതിനിടെ, യുഎസ് വൈസ് പ്രസിഡന്റ് ജെ.ഡി. വാൻസ്, വിദേശകാര്യ സെക്രട്ടറി മാർക്കോ റൂബിയോ എന്നിവർ ഉൾപ്പെടെയുള്ള സംഘം ഒമാനിൽ ഇറാൻ പ്രതിനിധികളുമായി ചർച്ചകൾ നടത്തുമെന്ന് റിപ്പോർട്ടുകളുണ്ടെങ്കിലും ഔദ്യോഗിക സ്ഥിരീകരണം ലഭിച്ചിട്ടില്ല.

ഇറാന്റെ എണ്ണവിൽപ്പനയ്‌ക്കെതിരായ ഉപരോധ ഇളവുകൾ പുനഃസ്ഥാപിക്കുന്നതടക്കമുള്ള ആവശ്യങ്ങൾ നിറവേറ്റാതെ ചർച്ചകളിൽ പങ്കെടുക്കില്ലെന്ന നിലപാടിലാണ് ഇറാൻ. സമാധാനശ്രമങ്ങളുടെ ഭാഗമായി ഖത്തർ പ്രതിനിധിസംഘവും ഇറാനിലെത്തി.

സംഘർഷം കനക്കുന്നതിനിടെ വെടിനിർത്തൽ ചർച്ചകൾ പുനരാരംഭിക്കണമെന്നാവശ്യപ്പെട്ട് പാകിസ്താൻ പ്രധാനമന്ത്രി ഷഹബാസ് ഷരീഫ്, ഇറാൻ പ്രസിഡന്റ് മസൂദ് പെസെഷ്കിയാനും ഖത്തർ അമീർ ഷൈഖ് തമീം ബിൻ ഹമദ് അൽ താനിയുമായും ആശയവിനിമയം നടത്തി.

പുതിയ സംഭവവികാസങ്ങൾ പശ്ചിമേഷ്യയെ വീണ്ടും സമ്പൂർണ യുദ്ധത്തിന്റെ വക്കിലെത്തിച്ചിരിക്കുകയാണ്.