വിലങ്ങാട് പുഴയിൽ കാണാതായ യുവാവിന്റെ മൃതദേഹം കണ്ടെത്തി

വാണിമേൽ/വിലങ്ങാട്: പുഴയിൽ കുളിക്കാനിറങ്ങിയ അഞ്ചംഗ സംഘത്തിലെ ഒരാൾ ഒഴുക്കിൽപ്പെട്ട് കാണാതായ സംഭവത്തിൽ യുവാവിന്റെ മൃതദേഹം കണ്ടെത്തി. ഞായറാഴ്ച വൈകുന്നേരമാണ് സംഭവം നടന്നത്.

കല്ലാച്ചിയിലെ ഒരു വർക്ക്‌ഷോപ്പിൽ ജോലി ചെയ്യുന്ന അതിഥി തൊഴിലാളിയാണ് അപകടത്തിൽപ്പെട്ടത്. ഇയാൾ ഉൾപ്പെടെ അഞ്ചുപേർ ചേർന്ന് പുഴയിൽ കുളിക്കുന്നതിനിടെ അപ്രതീക്ഷിതമായി ശക്തമായ ഒഴുക്കിൽപ്പെട്ട് യുവാവ് വെള്ളത്തിൽ മുങ്ങിപ്പോവുകയായിരുന്നു. കൂടെയുണ്ടായിരുന്നവർ രക്ഷപ്പെടുത്താൻ ശ്രമിച്ചെങ്കിലും വിജയിച്ചില്ല.

വിവരമറിഞ്ഞ് അഗ്നിരക്ഷാസേന, പോലീസ്, നാട്ടുകാർ എന്നിവർ സ്ഥലത്തെത്തി തിരച്ചിൽ ആരംഭിച്ചു. ശക്തമായ ഒഴുക്കും പ്രതികൂല കാലാവസ്ഥയും തിരച്ചിലിന് വെല്ലുവിളിയായി. രാത്രി ഇരുട്ട് കാരണം തിരച്ചിൽ താൽക്കാലികമായി നിർത്തിവെച്ചതിനു ശേഷം തിങ്കളാഴ്ച രാവിലെ വീണ്ടും ആരംഭിച്ചു.

മൂന്ന് ദിവസമായി തുടരുന്ന തിരച്ചിലിനൊടുവിൽ ഇന്ന് രാവിലെയാണ് യുവാവിന്റെ മൃതദേഹം പുഴയിലെ ഒരു മരത്തിൽ കുടുങ്ങിയ നിലയിൽ കണ്ടെത്തിയത്.

സംഭവത്തിനിടെ കുളിക്കാനിറങ്ങാതെ കരയിൽ നിന്നിരുന്ന സുഹൃത്തിന്റെ സമയോചിത ഇടപെടലിലൂടെ മറ്റു മൂന്ന് പേർ തലനാരിഴയ്ക്ക് രക്ഷപ്പെടുകയായിരുന്നു.

ശക്തമായ ഒഴുക്കുള്ള പുഴകളിലും മലവെള്ളപ്പാച്ചിൽ സാധ്യതയുള്ള പ്രദേശങ്ങളിലും കുളിക്കുമ്പോൾ അതീവ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി.

വാർത്ത : ഉനൈസ് കുറ്റ്യാടി