കുതിരാൻ തുരങ്കത്തിന് സമീപം മണ്ണിടിച്ചിൽ

തൃശൂർ: കുതിരാൻ തുരങ്കത്തിന്റെ പടിഞ്ഞാറെ ഭാഗത്ത് മണ്ണിടിച്ചിൽ ഉണ്ടായതായി റിപ്പോർട്ട്. ചെറിയതോതിലാണ് മണ്ണിടിച്ചിലുണ്ടായിട്ടുള്ളതെന്നാണ് പ്രാഥമിക വിവരം. തുരങ്കത്തിന് രണ്ട് ഭാഗങ്ങളിലായിട്ടാണ് മണ്ണിടിച്ചിലുണ്ടായിരിക്കുന്നത്. ഇടിഞ്ഞുവീണ മണ്ണ് പാറയ്ക്കിടയിലായാണ് നിലവിൽ കുടുങ്ങിക്കിടക്കുന്നത്.

സംഭവസ്ഥലത്ത് ജില്ലാ കലക്ടർ ശിഖാ സുരേന്ദ്രനും കെ. രാജൻ എംഎൽഎയും നേരിട്ടെത്തി സ്ഥിതിഗതികൾ വിലയിരുത്തി. പ്രദേശത്ത് ഇപ്പോഴും ശക്തമായ മഴ തുടരുന്നതിനാൽ ആശങ്ക നിലനിൽക്കുന്നുണ്ട്. എങ്കിലും, ഇടിഞ്ഞുവീണ മണ്ണ് റോഡിലേക്ക് ഇതുവരെ പതിക്കാത്തതിനാൽ നിലവിൽ സ്ഥലത്ത് ഗതാഗത തടസ്സങ്ങളൊന്നും റിപ്പോർട്ട് ചെയ്തിട്ടില്ല.

ദേശീയപാത എൻജിനിയർമാർ സ്ഥലത്ത് നേരിട്ടെത്തി വിശദമായ പരിശോധന നടത്തുമെന്ന് അറിയിച്ചിട്ടുണ്ട്. കൂടാതെ, മണ്ണിടിഞ്ഞ മുകൾ ഭാഗത്തേക്ക് എത്തി പരിശോധന നടത്തുന്നതിനായി വനംവകുപ്പ് ഉദ്യോഗസ്ഥരുടെ സഹായം തേടുമെന്ന് കെ. രാജൻ എംഎൽഎ വ്യക്തമാക്കി.

നിലവിൽ കാര്യമായ പ്രശ്നങ്ങളൊന്നുമില്ലെന്നാണ് അധികൃതർ അറിയിച്ചിട്ടുള്ളതെന്ന് ജില്ലാ കലക്ടർ ശിഖാ സുരേന്ദ്രൻ വ്യക്തമാക്കി. ദേശീയപാത അധികൃതരും വനംവകുപ്പ് ഉദ്യോഗസ്ഥരും സംയുക്തമായി മണ്ണിടിച്ചിലുണ്ടായ ഭാഗത്ത് പരിശോധന നടത്തും. പ്രദേശത്തിന്റെ മുകളിൽ എത്തി പരിശോധിച്ചാൽ മാത്രമേ കൂടുതൽ വിവരങ്ങൾ വ്യക്തമാകൂ എന്നും, മുകളിൽ ഏതെങ്കിലും തരത്തിലുള്ള വെള്ളക്കെട്ടുകൾ രൂപപ്പെട്ടിട്ടുണ്ടോയെന്നും പരിശോധിക്കുമെന്ന് അവർ കൂട്ടിച്ചേർത്തു.