സഹകരണ ബാങ്കുകളിൽ ED റെയ്ഡ്! 3 ജില്ലകളിൽ വ്യാപക പരിശോധന

സഹകരണ ബാങ്കുകളിൽ ഇഡി റെയ്ഡ്; മൂന്ന് ജില്ലകളിൽ വ്യാപക പരിശോധന

കൊച്ചി: കേരളത്തിലെ സഹകരണ ബാങ്കുകളുമായി ബന്ധപ്പെട്ട സാമ്പത്തിക ക്രമക്കേടുകളിലും കള്ളപ്പണം വെളുപ്പിക്കൽ കേസുകളിലും എൻഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) വ്യാപക പരിശോധന. കള്ളപ്പണം വെളുപ്പിക്കൽ തടയൽ നിയമമായ പി.എം.എൽ.എ പ്രകാരം രജിസ്റ്റർ ചെയ്ത കേസുകളിലാണ് സംസ്ഥാനത്തെ വിവിധ കേന്ദ്രങ്ങളിൽ ഒരേസമയം പരിശോധന നടക്കുന്നത്.

ഇന്ന് പുലർച്ചെ മുതൽ ആരംഭിച്ച പരിശോധന പ്രധാനമായും എറണാകുളം, തൃശ്ശൂർ, കോഴിക്കോട് ജില്ലകളിലാണ്. തൃശ്ശൂരിൽ അഞ്ചിടങ്ങളിലാണ് പരിശോധന പുരോഗമിക്കുന്നത്.

ബാങ്കുകളുടെ ആസ്ഥാനങ്ങളും ശാഖകളും കൂടാതെ നിലവിലെയും മുൻകാലത്തെയും ഭരണസമിതി അംഗങ്ങൾ, പ്രസിഡന്റുമാർ, മുതിർന്ന ഉദ്യോഗസ്ഥർ തുടങ്ങിയവരുടെ വീടുകളിലും പരിശോധന നടക്കുന്നുണ്ട്.

ബിനാമി അക്കൗണ്ടുകളിലൂടെ പണം കൈമാറിയെന്ന ആരോപണം, ഒരേ വസ്തുവിന്റെ രേഖകൾ ഉപയോഗിച്ച് ഒന്നിലധികം വായ്പകൾ അനുവദിച്ചെന്ന ആരോപണം, കെവൈസി മാനദണ്ഡങ്ങൾ പാലിക്കാതെ നിക്ഷേപങ്ങൾ സ്വീകരിച്ചെന്ന ആരോപണം തുടങ്ങിയവയും അന്വേഷണത്തിന്റെ പരിധിയിലുണ്ട്.

അങ്കമാലി അർബൻ സഹകരണ ബാങ്കുമായി ബന്ധപ്പെട്ട് 121 കോടി രൂപയോളം വരുന്ന സാമ്പത്തിക ക്രമക്കേട് കണ്ടെത്തിയതായി ഇഡി നേരത്തെ വ്യക്തമാക്കിയിരുന്നു. ഇതുമായി ബന്ധപ്പെട്ട രേഖകളും സാമ്പത്തിക ഇടപാടുകളും ഉൾപ്പെടെയാണ് നിലവിലെ പരിശോധനയിൽ പരിശോധിക്കുന്നത്.

സഹകരണ ബാങ്കുകളുമായി ബന്ധപ്പെട്ട സാമ്പത്തിക ക്രമക്കേടുകളിലും കള്ളപ്പണം വെളുപ്പിക്കൽ ആരോപണങ്ങളിലും കേന്ദ്ര ഏജൻസിയുടെ അന്വേഷണം ശക്തമാകുന്നതിന്റെ സൂചനയാണ് വിവിധ ജില്ലകളിലായി നടക്കുന്ന ഇന്നത്തെ പരിശോധന.