ഷാർജയിൽ വാഹനാപകടത്തിൽ കോഴിക്കോട് സ്വദേശി അടക്കം 2 യുവാക്കൾ മരിച്ചു; ഒരാൾക്ക് ഗുരുതര പരിക്ക്

​ ഷാർജ: യു.എ.ഇയിലെ ഷാർജയിലുണ്ടായ ദാരുണമായ വാഹനാപകടത്തിൽ രണ്ട് മലയാളി യുവാക്കൾ മരണപ്പെട്ടു. അപകടത്തിൽ ഒരാൾക്ക് ഗുരുതരമായി പരിക്കേറ്റു. മലപ്പുറം സ്വദേശി ഷാരിഖ്, കോഴിക്കോട് ബാലുശ്ശേരി ചീക്കിലോട് സ്വദേശി രമേഷ് കുമാർ എന്നിവരാണ് മരണപ്പെട്ടത്.​അപകടത്തിൽ ഗുരുതരമായി പരിക്കേറ്റ ആലപ്പുഴ സ്വദേശി അജ്മലിനെ ഉമ്മുൽ ഖുവൈനിലെ ആശുപത്രിയിൽ പ്രവേശിപ്പിച്ചു. ഷാർജയിലെ ഒരു കാറ്ററിങ് സർവീസ് സ്ഥാപനത്തിലെ ജീവനക്കാരാണ് അപകടത്തിൽപെട്ട മൂവരും. ജോലി ആവശ്യത്തിനായി സഞ്ചരിക്കവേയാണ് വാഹനം അപകടത്തിൽപെട്ടത്.​മരണപ്പെട്ട ഷാരിഖിന്റെയും രമേഷ് കുമാറിന്റെയും മൃതദേഹങ്ങൾ നിലവിൽ ഷാർജ അൽ ഖാസിമി ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നിയമപരമായ തുടർനടപടിക്രമങ്ങൾ പൂർത്തിയാക്കിയ ശേഷം മൃതദേഹങ്ങൾ എത്രയും വേഗം നാട്ടിലെത്തിക്കാനുള്ള ശ്രമങ്ങൾ സാമൂഹിക പ്രവർത്തകരുടെയും ബന്ധുക്കളുടെയും നേതൃത്വത്തിൽ പുരോഗമിക്കുന്നു.