ബാലുശ്ശേരിയിൽ യുവതിയുടെ രണ്ടരപ്പവൻ മാല പൊട്ടിച്ച കേസ്; പ്രതി പിടിയിൽ

ബാലുശ്ശേരി: ജോലി കഴിഞ്ഞ് വൈകുന്നേരം വീട്ടിലേക്ക് മടങ്ങുകയായിരുന്ന യുവതിയുടെ രണ്ടരപ്പവൻ സ്വർണമാല പൊട്ടിച്ചെടുത്ത് രക്ഷപ്പെടാൻ ശ്രമിച്ച കേസിൽ പ്രതിയെ ബാലുശ്ശേരി പൊലീസ് പിടികൂടി. തലയാട് തുടിയാടിമേൽ ഹംസയുടെ മകൻ സഹൽ (28) ആണ് അറസ്റ്റിലായത്.

ഉണ്ണിക്കുളം സ്വദേശിനിയായ അനുശ്രീ ശനിയാഴ്ച വൈകുന്നേരം വീട്ടിലേക്ക് മടങ്ങുന്നതിനിടെയാണ് സംഭവം. പിന്നാലെ എത്തിയ പ്രതി കഴുത്തിലുണ്ടായിരുന്ന രണ്ടരപ്പവൻ സ്വർണമാല പൊട്ടിച്ചെടുത്ത് ഓടി രക്ഷപ്പെടുകയായിരുന്നു. അനുശ്രീ പ്രതിയെ പിന്തുടർന്നെങ്കിലും പിടികൂടാനായില്ല.

സംഭവത്തിന് പിന്നാലെ ബാലുശ്ശേരി പൊലീസ് നടത്തിയ അന്വേഷണത്തിൽ പ്രദേശത്തെ സിസിടിവി ദൃശ്യങ്ങൾ പരിശോധിച്ച് പ്രതിയെ തിരിച്ചറിഞ്ഞു. തുടർന്ന് നടത്തിയ അന്വേഷണത്തിനൊടുവിൽ 2026 സെപ്റ്റംബർ 1ന് വയനാട്ടിൽ നിന്നാണ് സഹലിനെ പൊലീസ് കസ്റ്റഡിയിലെടുത്തത്.

ബാലുശ്ശേരി ഇൻസ്‌പെക്ടർ റഫീഖിന്റെ നേതൃത്വത്തിൽ സബ് ഇൻസ്‌പെക്ടർ അനുഷ ഗോപിനാഥ്, എസ്.സി.പി.ഒ ജംഷിദ്, ഡാൻസാഫ് സ്ക്വാഡ് അംഗങ്ങളായ ഷാഫി, ജയകൃഷ്ണൻ, ജോജോ, ജയേഷ്, ഷാജി എന്നിവർ ചേർന്ന സംഘമാണ് പ്രതിയെ പിടികൂടിയത്.

പ്രതിയെ 2026 സെപ്റ്റംബർ 2ന് കോടതിയിൽ ഹാജരാക്കി. കോടതി പ്രതിയെ പൊലീസ് കസ്റ്റഡിയിൽ വിട്ടു. ഇയാൾക്കെതിരെ വിവിധ പൊലീസ് സ്റ്റേഷനുകളിൽ സമാന സ്വഭാവമുള്ള കേസുകൾ നിലവിലുണ്ടെന്ന് പൊലീസ് അറിയിച്ചു.