ചൊക്ലിയിൽ നിന്ന് കാണാതായ ശിവസൂര്യയ്ക്കായി അന്വേഷണം വാരണാസിയിലേക്ക്; പോലീസ് സംഘം ഇന്ന് കാശിയിലെത്തും

കണ്ണൂർ: കണ്ണൂർ ചൊക്ലിയിൽ നിന്ന് കാണാതായ പതിനേഴുകാരൻ ശിവസൂര്യയെ കണ്ടെത്താനുള്ള ശ്രമങ്ങളുടെ ഭാഗമായി കേരള പോലീസ് സംഘം ഇന്ന് വാരണാസിയിലെത്തും. വാരണാസിയിലെ പരമാവധി സിസിടിവി ദൃശ്യങ്ങൾ പരിശോധിച്ച് കുട്ടിയെ കണ്ടെത്തുകയാണ് അന്വേഷണ സംഘത്തിന്റെ ലക്ഷ്യം.മൊബൈൽ ഫോൺ വാങ്ങി വെച്ചതിലുള്ള വിരോധംഓഗസ്റ്റ് എട്ടിനാണ് ശിവസൂര്യയെ വീട്ടിൽ നിന്ന് കാണാതാകുന്നത്. മൊബൈൽ ഫോൺ ഉപയോഗിച്ചതിന് വീട്ടുകാർ ഫോൺ വാങ്ങി വെച്ചതിലുള്ള വിഷമത്തിൽ 'കാശിക്ക് പോകുന്നു' എന്ന് കുറിപ്പ് എഴുതി വെച്ച ശേഷമാണ് കുട്ടി ഇറങ്ങിപ്പോയത്. ശിവസൂര്യയെ കാണാതായിട്ട് ഇന്ന് 18 ദിവസം തികയുകയാണ്.കേരളത്തിലും അന്വേഷണം ഊർജ്ജിതംകുട്ടിയെ കണ്ടെത്താനായി പ്രത്യേക അന്വേഷണ സംഘം രൂപീകരിച്ച് കേരളത്തിലെ വിവിധ ഇടങ്ങളിൽ ഇതിനോടകം വ്യാപക പരിശോധന നടത്തിയിരുന്നു. എന്നാൽ ഇതുവരെ പോലീസിന് കൃത്യമായ സൂചനകളൊന്നും ലഭിച്ചിട്ടില്ല. ഈ സാഹചര്യത്തിലാണ് കുട്ടി എഴുതിവെച്ച കുറിപ്പിന്റെ അടിസ്ഥാനത്തിൽ അന്വേഷണം ഉത്തരേന്ത്യയിലേക്ക് വിപുലീകരിക്കാൻ പോലീസ് തീരുമാനിച്ചത്. വാരണാസിയിലെ റയിൽവേ സ്റ്റേഷനുകൾ, ബസ് സ്റ്റാൻഡുകൾ, മറ്റ് പൊതുയിടങ്ങൾ എന്നിവിടങ്ങളിലെ സിസിടിവി ദൃശ്യങ്ങൾ പോലീസ് പരിശോധിക്കും.