അമേരിക്കൻ ഇടക്കാല തെരഞ്ഞെടുപ്പിൽ ഡെമോക്രാറ്റുകൾക്ക് ചരിത്രവിജയം; റിപ്പബ്ലിക്കൻ പാർട്ടിയിൽ ഭിന്നത രൂക്ഷം, മലയാളി നിത്യ രാമനും വിജയിച്ചു

വാഷിങ്ടൺ: അമേരിക്കൻ ഇടക്കാല തെരഞ്ഞെടുപ്പിൽ ഡെമോക്രാറ്റിക് പാർട്ടിക്ക് വൻ ചരിത്രവിജയം. ജനപ്രതിനിധിസഭയിൽ 250 സീറ്റുകൾ പിന്നിട്ട ഡെമോക്രാറ്റുകൾ റിപ്പബ്ലിക്കൻ പാർട്ടിയിൽ നിന്ന് മാത്രം 41 സീറ്റുകളാണ് പിടിച്ചെടുത്തത്. ട്രംപ് ഭരണകൂടത്തിന്റെ ഇഷ്ടാനുസരണം പ്രവർത്തിച്ചിരുന്ന കോൺഗ്രസിന്റെ കാലഘട്ടത്തിന് അവസാനമായെന്ന് നിയോഗിക സ്പീക്കർ ഹക്കീം ജെഫ്രീസ് വ്യക്തമാക്കി. ലോസ് ആഞ്ചലസിൽ മലയാളിയായ നിത്യ രാമനും തെരഞ്ഞെടുപ്പിൽ മിന്നുന്ന വിജയം നേടി ചരിത്രം കുറിച്ചു. അതേസമയം, കനത്ത തിരിച്ചടിയെ തുടർന്ന് റിപ്പബ്ലിക്കൻ നേതൃത്വത്തിൽ ഭിന്നത രൂക്ഷമായിരിക്കുകയാണ്.തെരഞ്ഞെടുപ്പിലെ പരാജയത്തിന് പിന്നാലെ ട്രംപ് ഭരണകൂടത്തിൽ വൻ മാറ്റങ്ങൾക്ക് സാധ്യതയുണ്ടെന്നാണ് വിവരങ്ങൾ. സ്റ്റേറ്റ് സെക്രട്ടറി മാർക്കോ റൂബിയോ സ്ഥാനം ഒഴിയുന്നതിനെക്കുറിച്ച് ആലോചിക്കുന്നതായി റിപ്പോർട്ടുകളുണ്ട്. റൂബിയോ വൈറ്റ് ഹൗസ് വൃത്തങ്ങളുമായി ചർച്ച നടത്തിയതായി ബ്ലൂംബെർഗ് വെളിപ്പെടുത്തിയെങ്കിലും രാജി വാർത്തകൾ വൈറ്റ് ഹൗസും സ്റ്റേറ്റ് ഡിപ്പാർട്ട്മെന്റും പൂർണ്ണമായി നിഷേധിച്ചു.ഇതിനിടെ, പ്രതിരോധ സെക്രട്ടറി പീറ്റ് ഹെഗ്സേത്തിനെതിരെ റിപ്പബ്ലിക്കൻ പാർട്ടിക്ക് ഉള്ളിൽ തന്നെ ശക്തമായ പ്രതിഷേധം ഉയരുന്നുണ്ട്. പീറ്റ് ഹെഗ്സേത്തിനെ സ്ഥാനത്തുനിന്ന് മാറ്റുമെന്ന സൂചനകൾ ഉണ്ടെങ്കിലും ഇയാൾക്ക് പൂർണ്ണ പിന്തുണയുമായി പ്രസിഡന്റ് ഡോണൾഡ് ട്രംപ് രംഗത്തെത്തി. അതേസമയം, ഇറാനെ പൂർണ്ണമായി നശിപ്പിക്കാൻ തനിക്ക് സാധിക്കുമെന്ന് ട്രംപ് വീണ്ടും മുന്നറിയിപ്പ് നൽകി. വിഷയത്തിൽ അടുത്ത നീക്കം എന്തായിരിക്കണമെന്ന് ഉടൻ തീരുമാനിക്കുമെന്നും ട്രംപ് കൂട്ടിച്ചേർത്തു