സൂപ്പർ ലീഗ് കേരള: കൊമ്പൻസിനെ വീഴ്ത്തി കാലിക്കറ്റ് സെമിയിൽ

തിരുവനന്തപുരം: സൂപ്പർ ലീഗ് കേരളയിൽ സെമി ഫൈനൽ ഉറപ്പിക്കുന്ന ആദ്യ ടീമായി കാലിക്കറ്റ് എഫ്സി. ചന്ദ്രശേഖരൻ നായർ സ്റ്റേഡിയത്തിൽ നടന്ന മത്സരത്തിൽ തിരുവനന്തപുരം കൊമ്പൻസ് എഫ്സിയെ 2-1 ന് കെട്ടുകെട്ടിച്ചാണ് കാലിക്കറ്റിന്റെ കുതിപ്പ്.

മാക്സിമിലിയാനോ ഉറൂട്ടിയും ലിയനാർഡോ ഡേവിഡും സന്ദർശകർക്കായി വലകുലുക്കി. ശ്രീരാജിന്റെ ബൂട്ടിൽ നിന്നാണ് കൊമ്പൻസിന്റെ ആശ്വാസ ഗോൾ വന്നത്.

ഏഴ് റൗണ്ടുകൾ പിന്നിടുമ്പോൾ 17 പോയിന്റുമായി കാലിക്കറ്റ് ഒന്നാം സ്ഥാനത്ത് തുടരുന്നു. എട്ട് പോയിന്റുള്ള കൊമ്പൻസ് നാലാം സ്ഥാനത്ത്.

മത്സരത്തിന്റെ നാലാം മിനിറ്റിൽ തന്നെ കാലിക്കറ്റ് ലീഡ് സ്വന്തമാക്കി. കൊമ്പൻസ് ഗോൾകീപ്പർ സത്യജിത്, കാലിക്കറ്റ് നായകൻ പ്രശാന്തിനെ ബോക്സിനുള്ളിൽ വീഴ്ത്തിയതിനെത്തുടർന്ന് റഫറി പെനാൽറ്റി വിധിച്ചു. കിക്കെടുത്ത മാക്സിമിലിയാനോക്ക് പിഴച്ചില്ല (1-0).

ഗോൾ നേടിയ ശേഷവും കാലിക്കറ്റ് ആക്രമണം തുടർന്നു. ആദ്യ പതിനഞ്ച് മിനിറ്റിനുള്ളിൽ നാല് മികച്ച അവസരങ്ങൾ കൂടി സൃഷ്ടിച്ചു. എന്നാൽ ഭാഗ്യം ആതിഥേയരെ തുണച്ചു. രണ്ട് സുവർണാവസരങ്ങൾ ലിയനാർഡോ ഡേവിഡ് നഷ്ടപ്പെടുത്തി. കളി അരമണിക്കൂർ പിന്നിട്ടതോടെ കനത്ത മഴ പെയ്തിറങ്ങിയെങ്കിലും പോരാട്ടവീര്യം കുറഞ്ഞില്ല. 40-ാം മിനിറ്റിൽ ബോക്സിന് പുറത്തുനിന്നുള്ള പാട്രിക് മോട്ടയുടെ ഫ്രീകിക്ക് നേരിയ വ്യത്യാസത്തിൽ കാലിക്കറ്റ് പോസ്റ്റിനെ ചാരി പുറത്തേക്ക് പോയി.

രണ്ടാം പകുതി തുടങ്ങി രണ്ടാം മിനിറ്റിൽ മാക്സിമിലിയാനോയുടെ ഷോട്ട് കൊമ്പൻസിന്റെ പോസ്റ്റിലിടിച്ച് മടങ്ങി. എന്നാൽ 51-ാം മിനിറ്റിൽ കാലിക്കറ്റ് ലീഡ് ഉയർത്തി. മാക്സിമിലിയാനോയുടെ ക്രോസ് വലയിലെത്തിച്ച ലിയനാർഡോ ഡേവിഡ്, ആദ്യപകുതിയിൽ നഷ്ടപ്പെടുത്തിയ അവസരങ്ങൾക്ക് പ്രായശ്ചിത്തം ചെയ്തു (2-0).

82-ാം മിനിറ്റിൽ കൊമ്പൻസ് ഒരു ഗോൾ മടക്കി. അർജുനിന്റെ പാസ് സ്വീകരിച്ച് ശ്രീരാജാണ് ആശ്വാസ ഗോൾ കണ്ടെത്തിയത് (2-1).

എട്ടാം റൗണ്ട് മത്സരങ്ങൾ വെള്ളിയാഴ്ച തുടങ്ങും. ആദ്യ മത്സരത്തിൽ തിരുവനന്തപുരം കൊമ്പൻസ് എഫ്സിക്ക് ഹോഴ്സ് കൊച്ചിയാണ് എതിരാളികൾ. തിരുവനന്തപുരം ചന്ദ്രശേഖരൻ നായർ സ്റ്റേഡിയമാണ് വേദി.