കേരളത്തിൽ മഴ ശക്തം,12 ജില്ലകളിൽ ഓറഞ്ച് അലർട്ട്, നാളെ വിദ്യാഭ്യാസ സ്ഥാപനങ്ങൾക്ക് അവധി

തെക്കൻ തമിഴ്നാടിന് മുകളിലുള്ള ചക്രവാതച്ചുഴിയും അറബിക്കടലിലെ കാലാവസ്ഥാ വ്യതിയാനങ്ങളും ശക്തമായതിനെ തുടർന്ന് സംസ്ഥാനത്ത് വീണ്ടും കനത്ത മഴയ്ക്ക് സാധ്യതയെന്ന് കാലാവസ്ഥ വകുപ്പ് മുന്നറിയിപ്പ് നൽകി. ഇതിന്റെ അടിസ്ഥാനത്തിൽ കേരളത്തിലെ 12 ജില്ലകളിൽ ഓറഞ്ച് അലർട്ട് പ്രഖ്യാപിച്ചു.

ഒറ്റപ്പെട്ട സ്ഥലങ്ങളിൽ അതിശക്തമായ മഴയ്ക്ക് സാധ്യതയുള്ളതിനാൽ മലയോര പ്രദേശങ്ങളിലെയും വെള്ളപ്പൊക്ക സാധ്യതയുള്ള മേഖലകളിലെയും ജനങ്ങൾ അതീവ ജാഗ്രത പാലിക്കണമെന്ന് അധികൃതർ നിർദേശിച്ചു. സുരക്ഷാ കാരണങ്ങളാൽ നാളെ വിവിധ ജില്ലകളിൽ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചിട്ടുണ്ട്.

ഇതിനിടെ, ഇന്നലെ രാത്രി മുതൽ പെയ്യുന്ന കനത്ത മഴ എറണാകുളം, കോട്ടയം, പത്തനംതിട്ട ജില്ലകളിൽ വ്യാപക നാശനഷ്ടം വിതച്ചു. പലയിടങ്ങളിലും വെള്ളക്കെട്ട് രൂപപ്പെട്ടിട്ടുണ്ട്. നദികളിൽ ജലനിരപ്പ് ഉയരുകയാണ്.

രക്ഷാപ്രവർത്തനങ്ങൾ ശക്തമാക്കാൻ ദേശീയ ദുരന്തനിവാരണ സേന (NDRF) സംഘം സ്ഥലത്തെത്തി. പാലായിൽ പുഴയിലെ ജലനിരപ്പ് ഉയർന്ന നിലയിലാണ്. രാവിലെ 10ഓടെ മഴയുടെ തീവ്രത കുറയുന്നുണ്ടെങ്കിലും ജാഗ്രത തുടരുന്നു.