ചായവില 12 രൂപയാക്കണം; പേരാമ്പ്രയിൽ ചർച്ച പരാജയം

പേരാമ്പ്ര: ഹോട്ടലുകളിലെ ഭക്ഷണവില കുറയ്ക്കണമെന്നും സാധാരണക്കാർ നിത്യേന ഉപയോഗിക്കുന്ന ഭക്ഷണസാധനങ്ങൾക്ക് ഏകീകൃത നിരക്ക് നടപ്പാക്കണമെന്നുമുള്ള ആവശ്യവുമായി പേരാമ്പ്രയിൽ നടക്കുന്ന സംയുക്ത സമരസമിതിയുടെ പ്രതിഷേധത്തിൽ സമവായമായില്ല. സമരസമിതിയും ഹോട്ടൽ വ്യാപാരികളുടെയും ഹോട്ടൽ അസോസിയേഷൻ പ്രതിനിധികളുടെയും നേതൃത്വത്തിൽ നടത്തിയ ചർച്ചയാണ് പരാജയപ്പെട്ടത്. ഇതോടെ പേരാമ്പ്രയിലെ ഹോട്ടൽ വ്യാപാരമേഖലയിലെ വിലനിർണയവുമായി ബന്ധപ്പെട്ട തർക്കം കൂടുതൽ സങ്കീർണമായി.

സാധാരണക്കാർ കൂടുതലായി ആശ്രയിക്കുന്ന ചായ, എണ്ണപ്പലഹാരങ്ങൾ, ഊണ് തുടങ്ങിയ ഭക്ഷണസാധനങ്ങളുടെ വില കുറയ്ക്കുകയും അവയ്ക്ക് ഏകീകൃത നിരക്ക് ഉറപ്പാക്കുകയും വേണമെന്നാണ് സംയുക്ത സമരസമിതിയുടെ പ്രധാന ആവശ്യം. ഒരു ഗ്ലാസ് സാധാരണ ചായയ്ക്ക് പേരാമ്പ്രയിലെ വിവിധ ഹോട്ടലുകളിൽ പത്ത് രൂപ മുതൽ പതിനഞ്ച് രൂപ വരെ ഈടാക്കുന്നുണ്ട്. സമരസമിതി മുന്നോട്ടുവെക്കുന്ന നിർദേശം ചായവില 12 രൂപയായി നിജപ്പെടുത്തണമെന്നാണ്. എണ്ണപ്പലഹാരങ്ങൾക്കും ഊണിനും ന്യായമായ വില ഉറപ്പാക്കണമെന്നും പൊറോട്ട ഉൾപ്പെടെയുള്ള ഭക്ഷണസാധനങ്ങളുടെ വിലയിൽ ഏകീകരണം വേണമെന്നും സമരസമിതി ആവശ്യപ്പെടുന്നു.

നിലവിൽ ഒരു പൊറോട്ടയ്ക്ക് ചില ഹോട്ടലുകളിൽ 12 രൂപയും മറ്റു ചിലയിടങ്ങളിൽ 13, 15 രൂപയുമാണ് ഈടാക്കുന്നത്. ഊണിന്റെ വിലയും ഹോട്ടലുകൾക്കനുസരിച്ച് വ്യത്യാസപ്പെടുന്നുണ്ട്. സാധാരണക്കാരുടെ ദൈനംദിന ചെലവിനെ നേരിട്ട് ബാധിക്കുന്ന ഇത്തരം വിലവ്യത്യാസങ്ങൾ നിയന്ത്രിക്കണമെന്നാണ് സമരസമിതിയുടെ നിലപാട്.

അതേസമയം, സമരസമിതി മുന്നോട്ടുവെക്കുന്ന നിരക്കിൽ ഭക്ഷണസാധനങ്ങൾ വിൽക്കാൻ കഴിയില്ലെന്നാണ് ഹോട്ടൽ ഉടമകളുടെ നിലപാട്. പാചകവാതകം, വൈദ്യുതി, ഭക്ഷ്യവസ്തുക്കളുടെ വില, ജീവനക്കാരുടെ വേതനം, സ്ഥാപനങ്ങളുടെ പ്രവർത്തനച്ചെലവ് തുടങ്ങി വിവിധ ഘടകങ്ങൾ ചൂണ്ടിക്കാട്ടിയാണ് വ്യാപാരികൾ വില കുറയ്ക്കുന്നതിൽ വിയോജിപ്പ് അറിയിക്കുന്നത്.

വിഷയത്തിൽ ഇതിനകം മൂന്ന് ഘട്ടങ്ങളിലായി ചർച്ചകൾ നടന്നതായാണ് വിവരം. ഇതിന്റെ ഭാഗമായി ഇന്ന് പേരാമ്പ്ര പോലീസ് സ്റ്റേഷനിൽ സി.ഐയുടെ നേതൃത്വത്തിൽ പോലീസ് ഉദ്യോഗസ്ഥരുടെ സാന്നിധ്യത്തിൽ ഇരുവിഭാഗം പ്രതിനിധികളെയും പങ്കെടുപ്പിച്ച് ചർച്ച നടത്തി. എന്നാൽ ചായവില 12 രൂപയായി നിജപ്പെടുത്തണമെന്ന സമരസമിതിയുടെ ആവശ്യത്തിൽ ഹോട്ടൽ ഉടമകൾ അനുകൂല നിലപാട് സ്വീകരിക്കാത്തതോടെ ചർച്ച തീരുമാനമാകാതെ പിരിയുകയായിരുന്നു.