റോഡ് നിർമ്മാണത്തിനിടെ കണ്ണൂർ ഇരിട്ടിയിൽ സ്ഫോടനം

കണ്ണൂർ: കണ്ണൂർ ഇരിട്ടിയിൽ റോഡ് നിർമ്മാണ ജോലികൾ നടക്കുന്നതിനിടെ സ്ഫോടനം. റോഡ് നിർമ്മാണത്തിനായി മണ്ണുമാന്തി യന്ത്രം ഉപയോഗിച്ച് മണ്ണ് നീക്കം ചെയ്യുന്നതിനിടയിലാണ് പൊട്ടിത്തെറിയുണ്ടായത്. കാട്ടുപന്നികളെ തുരക്കാൻ ഉപയോഗിക്കുന്ന പന്നിപ്പടക്കമാണ് പൊട്ടിയതെന്നാണ് പ്രാഥമിക നിഗമനം.

സംഭവത്തിൽ ആളപായം ഇതുവരെ റിപ്പോർട്ട് ചെയ്തിട്ടില്ലെങ്കിലും, സ്ഫോടനത്തിന്റെ ആഘാതം നാട്ടുകാരിൽ ഭീതി പരത്തിയിട്ടുണ്ട്. വിവരം അറിഞ്ഞ ഉടൻ പൊലീസും മറ്റ് അധികൃതരും സ്ഥലത്തെത്തി പരിശോധന ആരംഭിച്ചിട്ടുണ്ട്. സമീപപ്രദേശങ്ങളിൽ സമാനമായ രീതിയിൽ മറ്റ് സ്ഫോടകവസ്തുക്കൾ വല്ലതും കിടപ്പുണ്ടോയെന്ന് കണ്ടെത്താൻ ഊർജിതമായ അന്വേഷണവും പരിശോധനയും പുരോഗമിക്കുകയാണ്.