പേരാമ്പ്രയിൽ മുതിർന്ന പൗരർക്ക് ഡിജിറ്റൽ സാക്ഷരതാ ക്ലാസുകൾ

പേരാമ്പ്ര: പേരാമ്പ്ര ഗ്രാമപഞ്ചായത്തിന്റെ നേതൃത്വത്തിൽ ലോക വയോജന ദിനാചരണത്തിന്റെ ഭാഗമായി സംഘടിപ്പിക്കുന്ന “തണലേകിയവർക്ക് തണലാവാം” പരിപാടിയുടെ ഭാഗമായി പഞ്ചായത്തിലെ 21 വാർഡുകളിലും മുതിർന്ന പൗരർക്കായി ഡിജിറ്റൽ സാക്ഷരതാ ക്ലാസുകൾ സംഘടിപ്പിച്ചു.

21 വാർഡുകളിലും ഒരേസമയം പരിശീലനം; സെപ്റ്റംബർ 30ന് മുതിർന്ന പൗരരുടെ സംഗമം

വാർഡ് മെമ്പർമാർ, അങ്കണവാടി വർക്കർമാർ, ആശാ വർക്കർമാർ എന്നിവരുടെ നേതൃത്വത്തിലാണ് വിവിധ വാർഡുകളിൽ ക്ലാസുകൾ സംഘടിപ്പിച്ചത്. പേരാമ്പ്രയിലെ ഡിഗ്നിറ്റി കോളേജ്, സി.കെ.ജി ഗവൺമെന്റ് കോളേജ്, സിൽവർ ആർട്സ് കോളേജ് എന്നിവിടങ്ങളിലെ എൻ.എസ്.എസ് വിദ്യാർത്ഥികൾ ഒരേസമയം 21 വാർഡുകളിലും എത്തിയാണ് മുതിർന്ന പൗരർക്ക് പരിശീലനം നൽകിയത്.

വീഡിയോ കോൾ ചെയ്യുന്നത്, വാട്സ്ആപ്പ് ഉൾപ്പെടെയുള്ള നവമാധ്യമങ്ങളുടെ ഉപയോഗം, ഫേസ്ബുക്ക്, ഇൻസ്റ്റഗ്രാം തുടങ്ങിയ സാമൂഹിക മാധ്യമങ്ങളുടെ സുരക്ഷിതമായ ഉപയോഗം, ഓൺലൈൻ തട്ടിപ്പുകളിൽ നിന്ന് രക്ഷപ്പെടുന്നതിനുള്ള സൈബർ സുരക്ഷാ മുൻകരുതലുകൾ തുടങ്ങിയ വിഷയങ്ങളാണ് ക്ലാസുകളിൽ പരിചയപ്പെടുത്തിയത്. കൂടാതെ, ChatGPT ഉൾപ്പെടെയുള്ള പുതിയ സാങ്കേതികവിദ്യകളെക്കുറിച്ചും മുതിർന്ന പൗരർക്ക് പരിചയപ്പെടുത്തി.

ഡിജിറ്റൽ സാങ്കേതികവിദ്യയുടെ ലോകത്തേക്ക് മുതിർന്ന പൗരരെ പരിചയപ്പെടുത്തുന്നതിനൊപ്പം തലമുറകൾ തമ്മിലുള്ള സൗഹൃദപരമായ ഇടപെടലിനും പരിപാടി അവസരമൊരുക്കി. മുതിർന്ന പൗരരുമായി നേരിട്ട് സംവദിച്ച് അവർക്ക് ആവശ്യമായ ഡിജിറ്റൽ കാര്യങ്ങൾ പഠിപ്പിക്കാൻ കഴിഞ്ഞത് തങ്ങൾക്കും പുതിയ അനുഭവമായിരുന്നുവെന്ന് എൻ.എസ്.എസ് വിദ്യാർത്ഥികൾ പറഞ്ഞു.

വയോജന ദിനാചരണത്തിന്റെ ഭാഗമായി സെപ്റ്റംബർ 30ന് പേരാമ്പ്ര ദക്ഷിണാമൂർത്തി കമ്മ്യൂണിറ്റി ഹാളിൽ മുതിർന്ന പൗരരുടെ സംഗമവും സംഘടിപ്പിക്കും. പേരാമ്പ്ര ഗ്രാമപഞ്ചായത്തിലെ 75 വയസ്സിന് മുകളിൽ പ്രായമുള്ള മുതിർന്ന പൗരരെ സംഗമത്തിൽ പങ്കെടുപ്പിക്കും. 85 വയസ്സിന് മുകളിൽ പ്രായമുള്ള മുതിർന്ന പൗരരെ ചടങ്ങിൽ ആദരിക്കുകയും ചെയ്യും.

മുതിർന്ന തലമുറയുടെ അനുഭവങ്ങളും അറിവുകളും സമൂഹത്തിന് മുതൽക്കൂട്ടാണെന്ന സന്ദേശം ഉയർത്തിപ്പിടിച്ചാണ് “തണലേകിയവർക്ക് തണലാവാം” പരിപാടി സംഘടിപ്പിക്കുന്നതെന്ന് ഗ്രാമപഞ്ചായത്ത് അധികൃതർ അറിയിച്ചു.