സസ്പെൻഷനിനെതിരെ ആശാ വർക്കർമാരുടെ മാർച്ച് നടന്നു; പേരാമ്പ്രയിൽ ശക്തമായ പ്രതിഷേധം

പേരാമ്പ്ര: ആശാ വർക്കർ പി.എം. സുലഭയ്‌ക്കെതിരെ എടുത്ത സസ്പെൻഷൻ നടപടി പിൻവലിക്കണമെന്നാവശ്യപ്പെട്ട് പേരാമ്പ്രയിൽ ആശാ വർക്കർമാരുടെ നേതൃത്വത്തിൽ പ്രഖ്യാപിച്ച പ്രതിഷേധ മാർച്ച് ഇന്ന് നടന്നു. വലിയ ജനപങ്കാളിത്തത്തോടെയാണ് മാർച്ച് സംഘടിപ്പിച്ചത്.

രാവിലെ 10.30-ന് പേരാമ്പ്ര ബസ്റ്റാൻഡ് സമീപത്തെ സി.ഐ.ടി.യു ഓഫീസ് പരിസരത്ത് നിന്ന് ആരംഭിച്ച മാർച്ച് പട്ടണത്തിലൂടെ നീങ്ങി പേരാമ്പ്ര ഗ്രാമപഞ്ചായത്ത് ഓഫീസിൽ സമാപിച്ചു. ആശാ വർക്കേഴ്സ് ഓൾ ഇന്ത്യ പ്രസിഡന്റ് പി.പി. പ്രേമ മാർച്ച് ഉദ്ഘാടനം ചെയ്തു. സി.ഐ.ടി.യു നേതാവ് കെ. സുനിൽ, മുൻ പഞ്ചായത്ത് പ്രസിഡണ്ട് വി.കെ. പ്രമോദ് എന്നിവർ ഉൾപ്പെടെ നിരവധി നേതാക്കൾ പങ്കെടുത്തു പ്രസംഗിച്ചു.

ആശാ വർക്കർമാർക്കൊപ്പം വിവിധ തൊഴിലാളി സംഘടനകളുടെയും ഇടതുപക്ഷ പ്രവർത്തകരുടെയും സാന്നിധ്യം പ്രതിഷേധത്തെ ശക്തിപ്പെടുത്തി. സസ്പെൻഷൻ നടപടി പിൻവലിക്കണമെന്നും തൊഴിലാളികളുടെ അവകാശങ്ങൾ സംരക്ഷിക്കണമെന്നും ആവശ്യപ്പെട്ട് പ്രതിഷേധക്കാർ മുദ്രാവാക്യങ്ങൾ മുഴക്കി.

ഗ്രാമപഞ്ചായത്ത് പ്രസിഡന്റിനെ തടഞ്ഞുവെച്ചെന്നാരോപിച്ചാണ് പി.എം. സുലഭയെ മൂന്നുമാസത്തേക്ക് സസ്പെൻഡ് ചെയ്‌തത്. എന്നാൽ, ആരോപണം സുലഭയും സമരത്തെ പിന്തുണക്കുന്ന നേതാക്കളും നിഷേധിച്ചു. നടപടി തൊഴിലാളികളുടെ ജനാധിപത്യ അവകാശങ്ങൾക്കെതിരായതാണെന്നും പിൻവലിക്കുന്നതുവരെ സമരം തുടരുമെന്നും യൂണിയൻ നേതാക്കൾ വ്യക്തമാക്കി.