പാങ്ങപ്പാറ 17-കാരന്റെ കൊലപാതകം: പൊലീസിന് വീഴ്ച പറ്റിയിട്ടില്ലെന്ന് സിറ്റി പോലീസ് കമ്മീഷണറുടെ റിപ്പോർട്ട്; ദുരൂഹത നീക്കാൻ സൈബർ അന്വേഷണം

​ തിരുവനന്തപുരം: തിരുവനന്തപുരം പാങ്ങപ്പാറയിൽ സ്കൂൾ വിദ്യാർത്ഥിയെ കൊലപ്പെടുത്തിയ സംഭവത്തിൽ പോലീസ് അന്വേഷണത്തിൽ വീഴ്ച പറ്റിയിട്ടില്ലെന്ന് സിറ്റി പോലീസ് കമ്മീഷണറുടെ ഔദ്യോഗിക റിപ്പോർട്ട്. ക്രമസമാധാന ചുമതലയുള്ള എ.ഡി.ജി.പിക്ക് സമർപ്പിച്ച റിപ്പോർട്ടിലാണ് ഇക്കാര്യം വ്യക്തമാക്കുന്നത്. രാത്രി 10:52-നാണ് കുട്ടുക്കനെ കാണാനില്ലെന്ന പരാതി സ്റ്റേഷനിൽ ലഭിക്കുന്നത്. എന്നാൽ, പരാതി ലഭിക്കുമ്പോഴേക്കും കുട്ടി കൊല്ലപ്പെട്ടിരുന്നുവെന്നും വിവരം ലഭിച്ചയുടൻ തന്നെ പോലീസ് കേസെടുത്ത് ബന്ധുക്കളുടെ സഹായത്തോടെ അന്വേഷണം ആരംഭിച്ചിരുന്നുവെന്നും റിപ്പോർട്ടിൽ പറയുന്നു.​സുഹൃത്തുക്കളിൽ നിന്ന് ലഭിച്ച വിവരത്തിന്റെ അടിസ്ഥാനത്തിൽ ഒന്നാം പ്രതിയായ പ്രായപൂർത്തിയാകാത്ത കുട്ടിയെ അന്ന് രാത്രി തന്നെ പോലീസ് കസ്റ്റഡിയിലെടുത്തിരുന്നു. എന്നാൽ പ്രായപൂർത്തിയാകാത്തതിനാൽ നിയമപരമായ നടപടികളുടെ ഭാഗമായി പുലർച്ചയോടെ വിട്ടയക്കുകയായിരുന്നു. തുടർന്ന് നടത്തിയ അന്വേഷണം ഉമർ എന്ന വ്യക്തിയിലേക്ക് എത്തിച്ചേരുകയും ചെയ്തു. കൊല്ലപ്പെട്ട കുട്ടിയുടെ ഫോൺ ഓഫ് ചെയ്തിരുന്നതിനാൽ പാങ്ങപ്പാറ പരിസരത്ത് വ്യാപകമായി അന്വേഷണം നടത്തിയെങ്കിലും കൃത്യമായ ലൊക്കേഷനിലേക്ക് പെട്ടെന്ന് എത്താൻ സാധിച്ചിരുന്നില്ല. എങ്കിലും മണിക്കൂറുകൾക്കകം പോലീസ് നടത്തിയ ശാസ്ത്രീയവും ശക്തവുമായ അന്വേഷണത്തിലൂടെ പ്രതികളിലേക്ക് എത്താൻ കഴിഞ്ഞുവെന്നും പോലീസിന്റെ ഭാഗത്തുനിന്ന് വീഴ്ചയൊന്നും ഉണ്ടായിട്ടില്ലെന്നും റിപ്പോർട്ടിൽ വിശദീകരിക്കുന്നു.​അതേസമയം, കൊലപാതകവുമായി ബന്ധപ്പെട്ട ദുരൂഹതകൾ ഇപ്പോഴും തുടരുകയാണ്. മരിച്ച അഭിരാമിന്റെ ഇൻസ്റ്റഗ്രാം അക്കൗണ്ടിൽ നിന്നുള്ള പല ചാറ്റുകളും അപ്രതീക്ഷിതമാണെന്ന് സൈബർ സെൽ പരിശോധനയിൽ കണ്ടെത്തിയിട്ടുണ്ട്. അഭിരാമിന്റെ സോഷ്യൽ മീഡിയ അക്കൗണ്ടുകൾ വിശദമായി പരിശോധിച്ചപ്പോഴാണ് ഇക്കാര്യം വ്യക്തമായത്. അഭിരാമിന്റെ ഇൻസ്റ്റഗ്രാം അക്കൗണ്ട് മറ്റൊരു പെൺസുഹൃത്തുമായി ഷെയർ ചെയ്യപ്പെട്ടിരുന്നു. ഏത് സാഹചര്യത്തിലാണ് ഈ സന്ദേശങ്ങളും ചാറ്റുകളും മാഞ്ഞുപോയത് എന്ന കാര്യം അന്വേഷണസംഘം ഗൗരവമായി പരിശോധിച്ചു വരികയാണ്.