ഭക്ഷ്യധാന്യമോ പുഴുക്കളുടെ കൂടോ...? റേഷൻ കടയിൽ വിതരണത്തിനായി എത്തിയ അരിയിൽ പുഴുക്കളെ കണ്ടെത്തി, ചാക്കുകൾ തിരിച്ചയച്ച് പ്രതിഷേധം

മൂവാറ്റുപുഴ: വാഴക്കുളം ടൗണിലെ റേഷൻ കടയിൽ വിതരണത്തിനായി എത്തിയ അരിയിൽ പുഴുക്കളെ കണ്ടെത്തി. മൂവാറ്റുപുഴയിലെ റേഷൻ കടകളിലേക്ക് എത്തിച്ച അരി ലോഡിലാണ് പുഴുക്കളുടെ സാന്നിധ്യം ശ്രദ്ധയിൽപ്പെട്ടത്.

വാഴക്കുളത്തെ എആർഡി 251-ാം നമ്പർ റേഷൻ കടയിൽ അരി ഇറക്കുന്നതിനിടെയാണ് ചാക്കുകളിൽ പുഴുക്കളുള്ളതായി കണ്ടെത്തിയത്.

സിഐടിയു ചുമട്ടുതൊഴിലാളികളാണ് ചാക്കുകളിൽ നിന്ന് പുഴുക്കൾ പുറത്തേക്ക് വരുന്നത് ആദ്യം ശ്രദ്ധിച്ചത്. തുടർന്ന് വിവരം അധികൃതരെ അറിയിക്കുകയായിരുന്നു. ഇതിന് പിന്നാലെ റേഷൻ കടയിൽ ഇറക്കിയ അരിച്ചാക്കുകൾ തുറന്ന് പരിശോധിച്ചപ്പോൾ അരിയിലും പുഴുക്കളെ കണ്ടെത്തി.

സംഭവത്തെ തുടർന്ന് റേഷൻ കടയിൽ ഇറക്കിവച്ചിരുന്ന അരിച്ചാക്കുകൾ ഉൾപ്പെടെ മുഴുവൻ ചാക്കുകളും തിരികെ വാഹനത്തിൽ കയറ്റി അയച്ചു. ഭക്ഷ്യയോഗ്യമല്ലാത്തതോ ഗുണനിലവാരത്തിൽ വീഴ്ചയുള്ളതോ ആയ ഭക്ഷ്യധാന്യങ്ങൾ റേഷൻ വിതരണ ശൃംഖല വഴി ജനങ്ങളിലേക്ക് എത്തിക്കാൻ ശ്രമിച്ചെന്നാരോപിച്ച് ഇടതു പ്രവർത്തകർ സ്ഥലത്തെത്തി പ്രതിഷേധിച്ചു.

ജനങ്ങളുടെ ആരോഗ്യത്തെ നേരിട്ട് ബാധിക്കാവുന്ന ഭക്ഷ്യധാന്യങ്ങളുടെ ഗുണനിലവാരം ഉറപ്പാക്കുന്നതിൽ വീഴ്ചയുണ്ടായോയെന്നതിൽ വ്യക്തത വരേണ്ടതുണ്ട്.

അരി വിതരണം ചെയ്തതുമായി ബന്ധപ്പെട്ട നടപടിക്രമങ്ങളും പരിശോധനകളും സംബന്ധിച്ച് ബന്ധപ്പെട്ട അധികൃതർ അടിയന്തരമായി വിശദീകരണം നൽകണമെന്ന ആവശ്യം ശക്തമാണ്. സംഭവത്തിൽ ഉത്തരവാദികളായവർക്കെതിരെ നടപടി സ്വീകരിക്കണമെന്നും ആവശ്യമുയർന്നിട്ടുണ്ട്.

English Summary:

Muvattupuzha: Worms found in rice delivered for distribution at Vazhakulam town ration shop. Worms noticed in load brought to ration shops in Muvattupuzha, found while unloading at ARD No.251 shop. CITU headload workers first noticed worms coming out of sacks and informed authorities. On opening, worms found inside rice too. All sacks were loaded back and sent away. Left workers protested alleging attempt to supply non-edible or low-quality grains through PDS. Demand for urgent explanation and action against responsible persons.

Ration Rice Ration Shop Rice Worms