കുന്നുമ്മൽ ഉപജില്ലാ സ്കൂൾ കലോത്സവം: സ്വാഗതസംഘം രൂപീകരിച്ചു

പാലേരി

: കുന്നുമ്മൽ ഉപജില്ലാ സ്കൂൾ കലോത്സവം നവംബർ 9 മുതൽ 13 വരെ വടക്കുമ്പാട് ഹയർ സെക്കൻഡറി സ്കൂളിൽ നടക്കും. കലോത്സവത്തിന്റെ വിജയകരമായ നടത്തിപ്പിനായി സ്വാഗതസംഘം രൂപീകരിച്ചു.

പേരാമ്പ്ര ബ്ലോക്ക് പഞ്ചായത്ത് പ്രസിഡന്റ് മിനി വട്ടക്കണ്ടി സ്വാഗതസംഘം രൂപീകരണ യോഗം ഉദ്ഘാടനം ചെയ്തു. ചങ്ങരോത്ത് ഗ്രാമപഞ്ചായത്ത് പ്രസിഡന്റ് നസീമ വാഴയിൽ അധ്യക്ഷത വഹിച്ചു. കുന്നുമ്മൽ ഉപജില്ലാ വിദ്യാഭ്യാസ ഓഫീസർ കെ. എം. രത്നവല്ലി കലോത്സവത്തിന്റെ നടത്തിപ്പ് സംബന്ധിച്ച അവതരണം നടത്തി.

കുന്നുമ്മൽ ഉപജില്ലയിലെ നൂറോളം സ്കൂളുകളിൽ നിന്നായി നാലായിരത്തോളം വിദ്യാർത്ഥികൾ കലോത്സവത്തിൽ പങ്കെടുക്കും. വിവിധ മത്സരങ്ങൾക്കായി അഞ്ചുദിവസങ്ങളിലായി വിദ്യാർത്ഥികളും അധ്യാപകരും രക്ഷിതാക്കളും വടക്കുമ്പാട് സ്കൂളിലെത്തും. കലോത്സവത്തിന്റെ വിജയകരമായ നടത്തിപ്പിന് നാട്ടുകാരുടെയും വിദ്യാർത്ഥികളുടെയും രക്ഷിതാക്കളുടെയും അധ്യാപകരുടെയും സഹകരണം അനിവാര്യമാണെന്ന് എ.ഇ.ഒ കെ. എം. രത്നവല്ലി പറഞ്ഞു.

വാഹീദ പറേമ്മൽ, സുനന്ദ് എസ്., അനിത യു., ഇബ്രാഹിം മാസ്റ്റർ, ആനേരി നസീർ മാസ്റ്റർ, കെ. എം. സാബു, സ്കൂൾ മാനേജർ കെ. വി. കുഞ്ഞിക്കണ്ണൻ, ബ്ലോക്ക് മെമ്പർ സുവർണ, വാർഡ് മെമ്പർ സക്കീന, പി.ടി.എ പ്രസിഡന്റ് കെ. എം. ഇസ്മായിൽ എന്നിവർ സംസാരിച്ചു. പ്രിൻസിപ്പാൾ ആർ. ബി. കവിത സ്വാഗതവും ഹെഡ്മാസ്റ്റർ വി. സുനിൽ നന്ദിയും പറഞ്ഞു.

സ്വാഗതസംഘം, പ്രോഗ്രാം, ഭക്ഷണം, താമസം, ഗതാഗതം, സ്റ്റേജ്, ഗ്രീൻ പ്രോട്ടോകോൾ, ഡോക്യുമെന്റേഷൻ തുടങ്ങിയ ചുമതലകൾക്കായി 16 സബ് കമ്മിറ്റികൾ രൂപീകരിച്ചു.

സ്വാഗതസംഘം ഭാരവാഹികളായി നസീമ വാഴയിൽ (ചെയർപേഴ്സൺ), കെ. എം. ഇസ്മായിൽ, കെ. വി. കുഞ്ഞിക്കണ്ണൻ (വൈസ് ചെയർമാൻമാർ), ആർ. ബി. കവിത (ജനറൽ കൺവീനർ), വി. അനിൽ, നാസർ താനാരി (ജോയിന്റ് കൺവീനർമാർ), കെ. എം. രത്നവല്ലി (ട്രഷറർ) എന്നിവരെ തെരഞ്ഞെടുത്തു.

ഷാഫി പറമ്പിൽ എം.പി., പാറക്കൽ അബ്ദുള്ള എം.എൽ.എ., അഭിജിത്ത് എം.എൽ.എ., അഡ്വ. ഫാത്തിമ തഹിലിയ എം.എൽ.എ., മില്ലി മോഹൻ, കെ. ശശീന്ദ്രൻ, മിനി വട്ടക്കണ്ടി എന്നിവർ രക്ഷാധികാരികളാണ്.